Í aðalskipulagi Árborgar er gert ráð fyrir að þjóðvegur 1 liggi í gegnum útivistarsvæðið okkar í Hellismýrinni, yfir efri Laugardælaeyju, golfvöllinn og sameinist síðan Suðurlandsvegi austan Selfoss. Þetta er óskalína vegagerðarinnar sem telur aðra leið vart koma til greina. Framsóknarmeirihlutinn, ef marka má ræðu forseta bæjarstjórnar á seinasta bæjarstjórnarfundi, virðist á sama máli og varar mjög við öllum hugmyndum um aðra veglínu, vegagerðin sé á móti því og svo geti það spillt áhuga Sjóvár á vegagerð milli Reykjavíkur og Selfoss. Sjálfstæðismeirihlutinn virðist hinsvegar ekki vera eins hræddur við umræðuna um aðra veglínu og vera tilbúinn að ræða rökstudda hugmynd sem fram hefur komið um nauðsyn þess að skoða málið betur og út frá fleiri sjónarhornum en hingað til hefur verið gert. Áhrif hraðbrautar í gegnum þéttbýli eru mikil og varanleg. Hún hefur áhrif á skipulag, aðgengi, félagslega uppbyggingu og almenna vellíðan íbúanna. Það er alveg ljóst að sú veglína sem nú er á döfinni er óskaveglína vegagerðarinnar byggð á vegtæknilegum forsendum. Það er fjarri lagi að vegtæknilegar forsendur séu nægjanleg rökfærsla fyrir framkvæmdinni í gegnum þéttbýlið vegna þess að margvísleg önnur áhrif þarf að vega og meta. Þær tvær hugmyndir sem uppi eru um veglínu gegnum Árborg, gegnum Hellismýri annarsvegar og sunnan flugvallar hinsvegar haf báðar kosti og galla sem nauðsynlegt er að leggja faglegt mat á. Íbúar sveitarfélagsins og komandi kynslóðir eiga kröfu á því að vinnubrögð séu vönduð, faglegt mat sé lagt á kosti og galla vegstæðanna og ákvörðun tekin á þeim grunni. Það er bæjarstjórnar að ráða því hvar þjóðvegur 1 liggur í gegnum þéttbýlið, það er hún sem hefur axlað þá ábyrgð að skipuleggja lífsrými komandi kynslóða. Vond vinnubrögð eru minnismerki um meirihluta sem lætur aðra hagsmuni ráða gerðum sínum en langtíma hagsmuni byggðar og íbúa. Það er einstakt hér í Árborg að enn skuli vera nægjanlegt rými til að stilla upp tveim valkostum um veglínu og skipuleggja framtíðarbyggð með tiliti til þess sem best reynist. Yfirleitt eiga þéttbýli ekki valkosti, en það eigum við og það eigum við að nýta okkur. Veiting framkvæmdaleyfis er í höndum bæjarstjórnar og hennar skylda er að vanda til verka þegar á döfinni er framkvæmd sem móta mun umhverfi og svipgerð alls þéttbýlisins um áratuga eða árhundraða skeið. Þegar framkvæmdir eru hafnar verður ekki aftur snúið. Því lagði undirritaður eftirfarandi tillögu fram á bæjarstjórnarfundi þann 13. september sl:
Bæjarstjórn Árborgar láti fara fram heildstæða skipulagsúttekt vegna legu þjóðvegar 1 í gegnum sveitarfélagið Árborg:
a) miðað við fyrirhugað vegstæði yfir efri Laugardælaeyju.
b) miðað við nýtt vegstæði sunnan flugvallar með tengingu við Eyrarveg og gegnum endurbættan Votmúlaveg.
Úttektin taki til vegstæðisins og byggðar í tengslum við það og hvernig legu vegarins megi haga í sem mestri sátt við byggð og fjölbreytta starfsemi innan sveitarfélagsins. Úttektin vegi og meti félags- og atvinnuleg áhrif vegarins og hvernig hönnun hans verði best háttað svo hann valdi sem minnstri röskun á daglegu lífi íbúanna en um leið stuðli að eflingu byggðar, mannlífs og atvinnustarfsemi. Ennfremur verði lagt ítarlegt mat á umhverfisáhrif vegar og umferðar og með hvaða hætti (legu og veggerð) verði unnt að lágmarka þann umhverfisskaða sem óhjákvæmilega fylgir þessari miklu framkvæmd.
Snorri Finnlaugsson, D lista lagði til að vísa tillögunni til Bæjarráðs til frekari umfjöllunar. Guð láti gott á vita! Það væri sannarlega óskandi að sjálfstæðismenn tækju sinnaskiptum í þessu máli og féllust á megintilgang tillögunnar, að láti fara fram heildstæða úttekt á áhrifum vegarins í gegnum þéttbýlið og taki svo upplýsta ákvörðun að því loknu.
Jón Hjartarson,
Vg Árborg