Vinstrihreyfingin - grænt framboð hefur í tvígang lagt fram á Alþingi svofellda tillögu til þingsályktunar:
„ Alþingi ályktar að fela menntamálaráðherra að hefja undirbúning að stofnun háskólaseturs á Selfossi í samvinnu við heimamenn og háskóla- og rannsóknastofnanir í héraði. Ráðherra geri Alþingi grein fyrir undirbúningsstarfinu og tillögum sínum um uppbyggingu háskólanáms á Selfossi fyrir 1. mars 2007.“
Eitt brýnasta mál landsbyggðarinnar er efling menntastofnana, rannsókna- og frumkvöðlasetra sem víðast um landið. Reynslan hefur sýnt fram á kosti þess að heimamenn stjórni slíkri starfsemi og byggi á tækniþekkingu, menningu, atvinnulífi og auðlindum hvers héraðs um sig í öflugu samstarfi við sambærileg setur í öllum landshlutum og erlendis. Nægir í því sambandi að horfa til klasasetursins Nýheima á Hornafirði sem hefur með sjálfstæði sínu, frumkvæði og sveigjanleika staðist fyllilega þær kröfur sem gerðar eru til öflugs háskóla- og nýsköpunarsamfélags þótt Nýheimum sé skorinn afar þröngur stakkur fjárhagslega af stjórnvöldum.
Blómlegt mannlíf byggist á menntun, fjölbreyttri atvinnu og góðri almannaþjónustu. Enginn einn þessara þátta nægir. Íbúum á Suðurlandi hefur fjölgað umtalsvert og útlit er fyrir áframhaldandi fjölgun íbúa á næstu árum. Afar mikilvægt er því að auka fjölbreytni í atvinnulífi á svæðinu, efla menntunarmöguleika
og almenna þjónustu við íbúana.
Sunnlendingar hafa ekki fengið samskonar framlög til uppbyggingar og miðlunar háskólanáms og
Vestfirðir, Norðurland og Austurland. Eins og víðar á landsbyggðinni er lægra hlutfall háskólamenntaðra
í landshlutanum en á höfuðborgarsvæðinu. Á aðalfundi Sambands sunnlenskra sveitarfélaga dagana 25. og 26. nóvember 2005 var samþykkt ályktun þar sem áhersla er lögð á að eflingu háskólamenntunar og bætt aðgengi almennings að henni sé eitt brýnasta hagsmunamál landshlutans í framtíðinni. Ákveðið var á fundinum að þær 80 milljónir kr. sem sveitarfélög á Suðurlandi eiga hjá Atvinnuþróunarsjóði og ætlunin var að setja í sérstakan sjóð til eflingar atvinnulífi á svæðinu, verði varið til að treysta undirstöður háskólanáms í
landshlutanum. Á aðalfundinum var jafnframt skorað á ríkisvaldið að koma myndarlega að uppbyggingu
háskólanáms á Suðurlandi, enda er málaflokkurinn á verksviði þess samkvæmt lögum. Sú ákvörðun
sveitarfélaganna í landshlutanum að verja 80 milljónum kr. til uppbyggingar háskólanáms á svæðinu
sýnir mikinn áhuga þeirra á málinu. Í framhaldinu er mikilvægt að ríkisvaldið komi að þessari uppbyggingu
með ríkulegum framlögum. Það gefur auga leið að háskólasetur myndigerbreyt a möguleikum fólks til að sækja sér frekari menntun nær sinni heimabyggð.
Ekki er vafi á því að stofnun háskólaseturs á Selfossi yrði kærkomin viðbót við Fjölbrautaskóla Suðurlands og aðrar stofnanir sem þar eru. Slíkar menntastofnanir mundu styðja vel hvor við aðra, og ekki bara á sviði menntunar þótt sú samvinna yrði hvað dýrmætust. Þar bætir hver stofnunin hina upp og eflir, sérstaklega ef unnið er undir einum hatti að hætti frjórra klasasetra. Á meðal íbúa á Suðurlandi er mikil eftirspurn eftir háskólamenntun í heimabyggð. Íbúafjöldi á þessu svæði er áætlaður um 20 þúsund manns. Háskólasetur á
Selfossi mundi styrkja þessa heildarmynd menntunar og bæta enn frekar búsetuskilyrðin á svæðinu og koma þar með til móts við eindregnar óskir íbúanna.
Ríkisstjórn Framsóknar- og Sjálfstæðisflokksins hefur til þessa hunsað tillögur Vinstri grænna um
stofnun háskólaseturs á Selfossi. Það er miður. En það koma tímar og það koma ráð á fardögum ríkisstjórnarinnar í vor.
Atli Gíslason skipar 1. sæti og Alma Lísa Jóhannsdóttir 2. sæti á framboðslista VG í Suðurkjördæmi.
Birt í Glugganum 8. mars 2007